語言衝突。對話。


曾幾何時,我一星期煲 N 本中文小說 (上至愛情下至歷史廣泛得很!),連教科書都不讀上課埋頭埋腦在桌下自讀自的,於是乎中文科成為我最感自豪的一科,亦是會考中死得比較沒那麼肉酸的一科。

到英國讀書後,因為選修的科目騎呢,身邊的全以英國人為主,日講夜對英文人自然變得有點洋化,除了寫 blog 外根本用不上任何中文 (所以一篇我要寫好幾小時!!!)。近期發現原來我是一個有語言衝突的人,例子如下:

》某日跟朋友 J 吃早餐,談起自己的親戚來。
J:我阿X成日有野就怪我阿媽,真係衰。
我:我果個都唔好得幾多,好有「心機」囉。
J:……………………
我:成日樣樣問,背後就講人……(blah blah blah)
J:其實你係唔係想講好有機心呀?
我:係呀。我頭先講左做咩呀?

》假期跟朋友在地鐵上的對話。同行的朋友 T 是個剛畢業的工程師。
T:我覺得女仔著制服好 sexy。例如我番工著果啲呢。
我:你著一件過果啲「蜞乸衣」?
F:………你係唔係想講蛤乸衣呀?你知唔知咩係蜞乸?
我:咦,係喎。

》在街上看到一個高貴的中年婦走過。
F:如果到呢個年齡仲係咁既樣算係 keep 得好好啦。
我:我覺得女人著「風濕褸」真係好有氣質,可惜我太矮著唔到。
F:……係乾濕褸呀。

》連家人都開始有微言。
我:就係果個唔知咩呢我唔記得叫咩啦,總之係佢啦。
媽:……究竟你想講咩?

我:唔係 laptop 呀,係部 desktop 呢放地下果部。兩樣唔同架,desktop 我上次都拆開過,你返去試下。
媽:咁姐係你上次拎去賣果部係乜姐?
我:laptop 囉,上次你同我一次拎去既。不過拆左個 hard disc 出黎啦,所以唔怕。賣左部 desktop 佢啦,阻鬼住曬,橫掂都 dead 左。
弟:你可唔可以講野唔好又中又英姐,好鬼煩呀。

我:fuck sake!咁 PK 都有既!?
媽:好心你啦,女仔人家成日講粗口,你知唔知 PK 係乜呀?
我:仆街囉,太耐無講中文順口姐。
媽:賴啦你!開口埋口整慣曬!


我是一個身體內不能容納兩種語言的怪人。一個月後就會回到日講夜講中文的世界,我只望英文不要退步,中文全忘了都沒關係啦,哈哈哈哈哈。又其實說,我只是在逃避去承認。

沒有留言:

發佈留言

Related Posts Plugin for WordPress, Blogger...