搭英航初體驗

因冰島火山爆發事件，返英國開學的日子一改再改，由原本的 4 月 19 日被推到 5 月 13 日，一個月喎！我妹班同學原本的機比她遲走，之但係推遲都比我倆早，可見英航的安排的確不合邏輯。

後聞有英國公開考試優先飛走呢支歌仔唱，妹就由朝早七點打電話去熱線打到中午，打 100 只有 5 次通，不用重撥功能的電話打絕不能成事。最後踩上英航辦公室，好衰唔衰遇上個「你要申我未陪笑囉的男職員」，你有你講佢有佢枱底用手機，比學校信佢睇係睇都唔睇就夾埋，令考試大過天的妹怒火燒到勁過五級大火。翌日不心息再踩上去，換來一個專業得多的女職員，兩天後就收到電話當晚可以飛。

而我，無考試的學生就無得嗲，最後搞到阿爸掏荷包拎多 3000 幾蚊買套機票比我由香港直飛婆羅洲，總之蝕好多錢之餘又多功夫做。剛在婆羅洲下機就收到阿媽消息，英航比我新機位 5 月 8 日走，呢頭婆羅洲玩完返港第二日即走，兩日搭兩次飛機之新體驗，真係一次就夠。

第一次搭英航 (British Airway / BA) 的機返英國，註：一般留英學生多選擇國泰航空 Cathay Pacific、英航 British Airways、維珍航空 Virgin Atlantic Airline、新西蘭航空 Air Zew Zealand、法航 Airfrance 等……老老實實，我一向都是 Air NZ 的忠實擁蠆，今次轉投英航只因貪多一倍的行李磅數。

晚餐大同小異都是雜菜沙律、餐包、主菜、甜品。沙律很鬼佬口味，水牛芝士有點酸，唯獨車厘茄最合口味。主菜雞配雜菜，普通烚菜無味，汁為配合反而有點鹹，雞塊上貌似豆瓣醬的不明醬料，兩者加起來變得過鹹了。

看到甜品紅莓芝士蛋糕，浮現腦海的是卡通中老鼠吃的芝士 (哈)。吃下感覺：硬、味道似香口膠。實在古怪。我妹倒不覺得有問題，加上英航多年來吸引了一班忠實乘客，又可以說味道這東西見人見致。

相比古怪晚餐後，簡單一個英式早餐卻正常得來美味喎。煙肉厚實少肥，我至怕肥油油的，這個加分；雞肉腸腸衣有彈性，容易切；磨菇理應是 creamy 的，這個白烚無什麼味；扣分的有小蛋糕，又是硬的。
趁登機前的十五分鐘去書店逛了一圈，原來有好幾本香港雜誌有機場推廣價 $10 (從來都是趕頭趕命上機實在少有閒情四周逛)。跟據妹的情報，英航播的戲沒什麼可觀性，於是快快手買了本 JESSICA ，果然機上悶到發慌，平常 13 小時機程我只睡 3 小時其餘時間一路睇戲，今次前所未有睡了 7 小時。今期雜誌附送的電話套不是我杯茶，因為不喜歡有圖案的東東，但個套大小卻乎合我部相機身材，之前遺失了相機套現在有它代替，算不錯。

英航的空中服務員都很好人，主要都是英國人很有親切感，有個英國人空姐會講咖啡的廣東話，可惜我鄰位的大叔以為她說茶 lol，另有少數香港人空姐作中英對照廣播。英航的學生機票每人可寄艙兩件各最多 23 公斤的行李，比其他航空公司多，要行李磅數就不能高要求。食物質素的話，我還是較喜歡新西蘭航空。